admin
بالی وڈ کے کونسے ستارے 2022 میں دنیا سے رخصت ہوگئے ؟ جانیے
ممبئی: (ویب ڈیسک) سال 2022 اپنے اختتام کو پہنچ چکا ہے، اس سال بالی وڈ کے کئی ستارے دنیا کو خیرباد کہہ گئے جس میں معروف گلوکاروں سمیت کئی اداکار شامل ہیں۔ آئیے جانتے ہیں کہ کون ہیں وہ عظیم ہستیاں جنہیں رواں برس ان کے پرستاروں نے کھو دیا۔ پنڈت برجو مہاراج:2022 کے آغاز میں
بھارتی ڈانسر، کمپوزر اور گلوکار پنڈت برجو مہاراج دہلی میں انتقال کرگئے تھے۔17 جنوری کو دنیا چھوڑ جانے والے ڈانسر کا پورا نام برج موہن مشرا تھا، اپنے ہنر کی وجہ سے انہیں 2016 میں فلم فیئر میں بہترین کوریوگرافر کا ایوارڈ دیا گیا تھا۔ اس کے علاوہ نیشنل فلم ایوارڈ میں بھی بیسٹ کوریوگرافی سمیت دیگر ایوارڈ سے برجو مہاراج کو نوازا جا چکا ہے۔ بپی لہری:بالی وڈ کے مشہور گلوکار بپی لہری 15 فروری کو دنیا کو خیرباد کہہ گئے تھے۔ بپی لہری کمپوزر اور گلوکار تھے، انہوں نے دے دے پیار دے، آئی ایم آ ڈسکو ڈانسر ، بمبئی سے آیا میرا دوست جیسے مشہور گانے گائے۔
لتا منگیشکر: لیجنڈری گلوکارہ لتا منگیشکر بالی وڈ کی جانی مانی شخصیات میں سے ایک ہیں، کئی عرصے تک اپنی آواز کا جادو جگانے والی لتا منگیشکر 92 سال کی عمر میں 6 فروری کو انتقال کر گئی تھیں۔ لتا منگیشکر کو 15 کے قریب ایوارڈز سے نوازا گیا ہے جن میں فلم فیئر میں بیسٹ فی میل پلے بیک سنگر اور اسپیشل لائف ٹائم اچیومنٹ ایوارڈز شامل ہیں۔
راجو شری واستو: بھارتی انٹرٹینمنٹ انڈسٹری کا جانا مانا نام راجو شری واستو بھی اپنے مداحوں سے رواں سال بچھڑ گئے۔ انہوں نے نا صرف مزاحیہ پروگرام میں لوگوں کو ہنسایا بلکہ فلموں میں بھی کامیڈی سے لوگوں کے دل جیتے، کامیڈین راجو شری واستو بالی وڈ کے لیجنڈ اداکار امیتابھ بچن کی آواز کی نقل بھی خوب اتار لیتے تھے۔ راجو شری واستو صحت میں خرابی کے باعث ستمبر میں 58 سال کی عمر میں انتقال کرگئے تھے۔
سدھو موسے والا: بھارت کے پنجابی گلوکار سدھو موسے والا کو بھی رواں برس قاتلانہ حملے میں موت کے گھاٹ اتار ا گیا۔ سدھو موسے والا 29 مئی 2022 کو دنیا سے رخصت ہوئے تھے۔ کے کے: کرشن کمار کناتھ المعروف کے کے نے بالی وڈ کے ہٹ گانے گا کر عوام کے دلوں میں جگہ بنائی۔ کے کے اسی سال انتقال کرگئے تھے، انہیں دوران کانسرٹ دل کا دورہ پڑا تھا۔ گلوکار کے مشہور گانوں میں آنکھوں میں تیری، اور میری جان، دل عبادت جیسے ہٹ گانے شامل ہیں، اس کے علاوہ انہوں نے کئی زبانوں میں گانے ریکارڈ کروائے ہیں۔
وکرم گوکھلے: انڈین ٹی وی اور فلم انڈسٹری میں اپنی اداکاری کے جوہر دکھانے والے اداکار وکرم گوکھلے بھی اپنے مداحوں کو اسی سال افسردہ کرگئے۔ انہوں نے ہم دل دے چکے صنم جیسی دیگر مشہور فلموں میں کام کیا ہے۔ تنیشا شرما: بھارتی ٹیلی ویژن کی ابھرتی ہوئی کم عمر اداکارہ تنیشا شرما نے حال ہی میں خودکشی کی۔ وہ ڈرامہ سیریل علی بابا داستان قابل کی شوٹنگ کررہی تھیں جس دوران سیٹ پر ہی انہوں نے گلے میں پھندا لگالیا۔
